Trèffen “Autorn kan Filzerhof”

PALÙ DEL FERSINA. Haier der Filzerhof vaiert 700 jarder (er ist augòngen en jor 1324), ont s Bersntoler Kulturinstitut organisiart drai trèffen ver za vourstelln piacher as kontarn va de inger bersntoler gamoa'schòft. De doin drai trèffen barn se hòltn pet de drai autorn, as de teitsch van Filzerhof.

Der earst van doin trèffen bart se hòltn en eirta as kimmp, as de 30 van heibeger. De Antonella Mott bart vourstelln der etnografisch atlante va de trentin lontschòft. S puach ist gamòcht va vil zoachen ont letratn as derstelln de trentin lontschòft, ont vourstellt de temen as hom za tea' petn lontschòftbèrk ont petn auziglbèrk; temen as, finz a bea'ne zait vour, sai' gaben asou bichte vern inger Trentin. Der Atlante lòk kennen aa de unterschittn petn inger tol, bou as a taitscha gamoa'schòft ist kemmen vil jorhundertn vour.

Der zboate trèff bart se hòltn pet de Alessandra Sebastiani, as hòt tschrim a puach as derzeilt a gschicht va de earste mitt van nai'zente jorhundert, bou as an mònn gahoasn Barnaba ist kemmen za lem en an òlta gruab en Bersntol, ont a ker as de vòrt hòt kennt de lait van plòtz. Der titl van puach ist “El Salvanel”; derbail en de vourstell de Chiara Paoli bart lesn stickler aroganommen van puach. Der doi trèff bart se hòltn en eirta as de 6 van agest.

S dritte mol ist petn Paolo Cova, as hòt tschrim s puach “Dominik il cròmero”. S ist de gschicht van Dominik, an krumer as geat za verkaven zaig durch de derver va de Boemia, a region as de bersntoler kennen guat, bavai s ist der plòtz bou as vil bersntolern krumer sai' gòngen za verkaven, vil jor vour. Der doi trèff bart se hòltn en eirta as de 13 van agest.

Òlla de trèffen barn se hòltn as de teitsch van Filzerhof, um òchta ont a hòlbs zobenz. De enteressiartn meing kemmen umansist ont a'ne schraim se inn. Ver òndera informazionen, men mu u'riaven oder schraim en Bersntoler Kulturinstitut.

Riassunto dell'articolo in lingua italiana:

Nell'ambito della ricorrenza dei 700 anni dalla fondazione del maso Filzerhof, si svolgerà un ciclo di incontri di presentazione di opere dedicate al contesto delle comunità di minoranza e della comunità mòchena. Gli incontri saranno tre e si svolgeranno nella suggestiva cornice del fienile del maso Filzerhof.

Il primo consisterà nella presentazione di un Atlante etnografico del paesaggio trentino, a cura di Antonella Mott – martedì 30 luglio; il secondo nella presentazione del romanzo di Alessandra Sebastiani “El Salvanel” - martedì 6 agosto; il terzo nella presentazione del romanzo di Paolo Cova “Dominik il cròmero” - martedì 13 agosto. Gli incontri si terranno alle ore 20.30. L'ingresso è libero e non è necessaria la prenotazione. Per ulteriori informazioni contattare l'Istituto Culturale Mòcheno.