Esam va bersntolerisch: augatu' de zaitn ver za schraim se inn
S ist moglech za schraim se inn en esam as versichert s kenn van bersntolerisch. De zaitn ver za ogem de vrong sai' finz as de 30 van leistagest. De enteressiartn meing se innschraim en oa'n van trittn QCER. De ausschaung bart kemmen gamòcht en sitz va de Tolgamoa'schòft Hoa Valzegu' ont Bersntol.
PALÙ DEL FERSINA. S sai' kemmen augatu' de zaitn ver za schraim se inn en de ausschaung va bersntolerisch. De ausschaung ist organisiart abia òll jor va de Tolgamoa'schòft Hoa Valzegu' ont Bersntol, ont der sitz van esam bart sai' prope de Tolgamoa'schòft. S ist a mogleket ver de sèlln as bintschn za kriang der patentin as versichert de kompetenzn en de sproch minder kennt. S ist moglech za schraim se inn en oa'n van trittn u'ganommen va de gònze Europa (QCER), no en Europeische Rot: A2, B1, B2, C1, C1 – learer pet en versichern van kennen de taitsch sproch, C1 – learer pet en versichern van kennen de taitsch sproch, ver de sèlln as schoa' hom der tritt C1 òrbetkategori D. Der tritt A2 ist lai a klòffeta ausschaung; de òndern sai' klòffet ont tschrim.
Der esam ist augatu' ver kandidatn as hom almen 17 jor. Derzua, de vrong miasn kemmen ogem vour en de 30 van leistagest. De vourstell va de vrog mias kemmen gamòcht no en modell aroganommen va de internetsait va de Tolgamoa'schòft Hoa Valzegu' ont Bersntol, zòmm pet de kòrt as lòk bissn as der kandidat hòt zolt de kostn va de ausschaung. De doin kostn sai': zeichen euro vern tritt A2 ont C1 – learer as schoa' hom der zertifikat C1 kategori D (tschrim ausschaung va taitsch); draisk euro ver de trittn B2, B1 ont C1; viarsk euro vern tritt C1 – pet de tschrim ausschaung va taitsch. De vrong miasn kemmen trong en omt bou de lait meing se pavrong (men mias se vouraus u'mèln), oder petn fax en numer 0461 519698, oder as de pec en adress comunita@pec.comunita.altavalsugana.tn.it, oder petn raccomandaretn priaf pet de zaruck kòrt (der giltto ist der sèll van stempl va de post) en adress va de Tolgamoa'schòft – Dinst General Kanzlai.
Men denkt as der zertificat ist gilte ver za kemmen au'ganommen en de òllgamoa'amministrazion. An ettlena òllgamoa'konkursn en de eirter van Bersntol oder va Persn suachen lait as hom der patentin as versichert s kenn van bersntolerisch, bavai s gasetz sòk as de òllgamoa'omtn miasn hom lait as kennen de lokaln sprochen, ont meing asou omport gem en de lait en de sai' sproch minder kennt.
Riassunto dell'articolo in lingua italiana:
È indetta la sessione d'esame 2024 per l'accertamento della conoscenza della lingua propria e della cultura della popolazione mòchena. I candidati dovranno presentare la domanda entro il giorno 30 settembre, secondo le modalità indicate sul sito della Comunità Alta Valsugana e Bersntol. I candidati dovranno avere compiuto il diciassettesimo anno d'età entro la data di presentazione della domanda. È possibile sostenere l'esame per uno qualsiasi dei livelli di competenza, che sono quelli definiti dal quadro comune di riferimento europeo (QCER).
