Augatu' der bando va “Drai konkursn ver a sproch”

PALÙ DEL FERSINA. S Bersntoler Kulturinstitut stitzt s prauch van bersntolerisch pet vil naiòrbetn. Oa'na van doin ist “Drai konkursn ver a sproch”. De inger gamoa'schòft kennt guat de doi naiòrbet, bavai sai' schoa' vil jor as s Institut trok sa envire, pet de unterstitz va de Autonome Region Trentin-Südtirol. Sech ber sa va glaim.

Van drai konkursn, der earst hoast se “Schualer ont Studentn”. De schualer va de Earsteschual ont va de Zboateschual as belln toalnemmen, miasn vourstelln de doin òrbetn: an tèckst as bersntolerisch as klòfft va de bersntoler gamoa'schòft, oder va òndera gamoa'schòftn ont minderhaitn va Balschlònt oder Europa, oder van an tema va haitzegento; derzua, an tèckst aa as balsch oder as taitsch, as de glaichen temen. Finz as de dritte klasse van Earsteschual, der tèckst as balsch oder as taitsch ist nèt verlònkt, ont der tèckst as bersntolerisch mu sai' an zoach, pet lai titln, rachler ont kurza sòtzn as bersntolerisch.

Ver de sezion ver de studentn, de toalnemmer miasn vourstelln an lònken tèckst pet temen as hom za tea' pet de bersntoler gamoa'schòft, pet de Autonome Region Trentin-Südtirol, oder pet òndera gamoa'schòftn va sprochminderhait va de Europeische Union. Der tèckst mias sai' as balsch oder as taitsch, ont hom a stuck as bersntolerisch. De enteressiartn en doi konkurs mias hom zan mearestn 28 jor ont sai' inntschrim en de hoaschual oder en de universitet.

Dòra, s hòt aa der konkurs “Filmer”, ver kurza filmen as bersntolerisch. De filmen miasn kemmen gamòcht van toalnemmer; sai' nèt vriarer van jor 2021; hom innhòltn van bersntoler lont oder gamoa'schòft; hom an titl; hom en derzuazaig de auspfillt kòrt as gip vrai de rèchtn ver de personaldatn; kemmen aroganommen as an oa'zegen DVD oder USB stick. Der doi konkurs “Filmer” ist toalt en drai sezionen: video social media; cortometraggi; òndera produktn. Zan leistn, s Bersntoler Kulturinstitut stitzt aa der konkurs gahoasn “Schrift”, ver tèckstn va poesia oder va prosa, as bersntolerisch.

Ver òlla drai de konkursn sai' vourtschauk prais en gèlt, ver almen de earstn drai gabinger van an iatn konkurs. De zaitn ver za schraim se inn ont trong-schicken de òrbetn en Bersntoler Kulturinstitut sai' vour de zbelva va de 31 van merz 2025. De toalnemm en òlla drai de konkursn ist umansist; de toalnemmer miasn vourstelln nèt mear as an oa'zega òrbet ver an iatn konkurs, pet de ausnom van konkurs Filmer.

De òrbet vourstellt mu sai' gamòcht van an oa'zegen toalnemmer, oder aa va mearer. Òlla de òrbetn vourstellt plaim en de hent van Institut, as mu prauchen sa ver de sai'na ziln; der autor bart meing sa prauchen en òndera konkursn oder naiòrbetn; en de konkursn kemmen nèt u'ganommen òrbetn schoa' gadruckt. S Praisgericht as schatzt de òrbetn ist gamòcht va drai mentschn, ont s kimmp tschèrlt van Amministrazionrot van Institut; de mu ausgem lai a toal van prais, oder gor koa'na.

De informazionen gem vour sai' a kloa's zòmmsetz: de enteressiartn miasn gea' asn sito van Bersntoler Kulturinstitut ver za schaung aus òlla de informazionen ont s sèll as men praucht.

Riassunto dell'articolo in lingua italiana:

L'Istituto Culturale Mòcheno, al fine di promuovere l'utilizzo della lingua mòchena, organizza anche per il 2025 l'iniziativa “Tre concorsi per una lingua”. I tre concorsi prevedono la presentazione di elaborati, parzialmente o totalmente scritti in lingua mòchena. I concorsi sono i seguenti: “Schualer ont Studentn” per scolari e per studenti; “Filmer” per la presentazione di prodotti audiovisivi; “Schrift” per testi letterari o poetici.

I lavori saranno valutati e premiati da una giuria, nominata dal Consiglio di Amministrazione dell'Istituto Culturale Mòcheno. La scadenza per la consegna dei lavori è fissata per le ore 12.00 del giorno 31 marzo 2025. Il dettaglio delle informazioni e dei requisiti per la partecipazione è disponibile alla pagina web dell'Istituto.